Ազգային Ժողովը 64 կողմ, 7 դեմ ձայներով, երկրորդ ընթերցմամբ և ամբողջությամբ ընդունեց «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքը։
Հիշեցնենք՝ առաջինից երկրորդ ընթերցում որոշակի փոփոխություններ էին կատարվել օրենքի նախագծում. նախաբանից դուրս էր եկել առաջին հատվածը՝ «ՀՀ-ն, արտահայտելով հայ ժողովրդի միասնական կամքը, …» նախադասությունը:
Եվրոպական ինտեգրման հարցերի մշտական հանձնաժողովի նախագահ Արման Եղոյանը տեղեկացրել էր՝ Կառավարությունն առաջարկել էր ընդհանրապես օրենքն ընդունել առանց նախաբանի:
Նախագծի տեքստի երկրորդ հատվածը ևս խմբագրվել է և վերաշարադրվել այսպես. «Հայաստանի Հանրապետությունը, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայունությունը և իրավունքի գերակայությունը, հայտարարում է ԵՄ-ին անդամակցելու գործընթացի մեկնարկը»:
Նախաձեռնող խմբի լիազոր ներկայացուցիչ Արտակ Զեյնալյանը տեղեկացրել էր՝ ՀՀ Սահմանադրության ընձեռած հնարավորության իրականացմամբ «Եվրաքվե» քաղաքացիական նախաձեռնությամբ էր ներկայացվել օրենքի նախագիծը:
Սահմանված ժամկետում նախաձեռնությունը հավաքել էր 60 հազար ստորագրություն:
«Օրենքի կարգի պահպանմամբ Հայաստանի 1000-ից ավելի համայնքներից ընդամենը 44-ում օրենքով նախատեսված ժամկետի կեսում հավաքվել է օրենքով սահմանված նվազագույն ստորագրությունների կրկնապատիկը: Նաև հասարակական հարցումները վկայում են այն մասին, որ ՀՀ ժողովուրդը հակված է, որպեսզի ՀՀ-ն անդամակցի ԵՄ-ին»,- տեղեկացրել էր Զեյնալյանը:
Փետրվարի 12-ի խորհրդարանի նիստում նախագիծն ընդունվել էր առաջին ընթերցմամբ:
Աղբյուրը՝ ՀՀ Առաջին Լրատավական Ալիք
