Վաշինգտոնը նախազգուշացրել է եվրոպական երկրներին ամերիկյան արտադրության զենք գնելուց հրաժարվելու հետևանքների մասին, գրում է Reuters-ը՝ հղում անելով աղբյուրներին։
Լրատվականի տվյալներով՝ վերջին շաբաթներին Վաշինգտոնից ստացված հաղորդագրություններում նշվում է, որ ԵՄ-ն քայլեր է ձեռնարկում խթանելու եվրոպական պաշտպանական արդյունաբերությունը՝ միաժամանակ սահմանափակելով ամերիկյան զենքի որոշակի տեսակների գնումները: Սահմանափակվում է նաև ամերիկյան արտադրողների մասնակցությունը զենքի մրցույթներին:
Երկու աղբյուրի համաձայն՝ ԱՄՆ պետքարտուղար Մարկո Ռուբիոն մարտի վերջին Լիտվայի, Լատվիայի և Էստոնիայի արտգործնախարարների հետ հանդիպման ժամանակ փոխանցել է, որ Միացյալ Նահանգները ցանկանում է շարունակել մասնակցել ԵՄ երկրների կողմից պաշտպանական գնումներին։ Արտգործնախարարների խոսքով՝ նա զգուշացրել է, որ ամերիկյան ընկերությունների ցանկացած բացառում եվրոպական մրցույթներից բացասաբար կընկալվի Վաշինգտոնի կողմից։
Պետքարտուղարության բարձրաստիճան պաշտոնյան ասել է, որ Ռուբիոն ծրագրում է այդ հարցը քննարկել այս շաբաթ Բրյուսել կատարելիք այցի ընթացքում, որտեղ նա մասնակցելու է ՆԱՏՕ-ի արտգործնախարարների հանդիպմանը:
