Եվրամիությունը ներկա իրավիճակը դիտարկում է որպես նոր պատմական հնարավորություն Հարավային Կովկասի համար՝ հայտարարել է Հարավային Կովկասի հարցերով Եվրամիության հատուկ ներկայացուցիչ Մագդալենա Գրոնոն ադրբեջանական «ԱՊԱ» գործակալության հետ հարցազրույցում։
Նրա խոսքով՝ ԵՄ-ն վճռական է տրամադրված՝ աջակցելու տարածաշրջանում խաղաղության առաջմղմանը և ամրապնդելու համագործակցությունը Հարավային Կովկասի երկրների հետ: ԵՄ ներկայացուցիչը հավելել է, որ Բրյուսելի համար առանցքային ռազմավարական շահ է տարածաշրջանում խաղաղության, կայունության և բարգավաճման խթանմանը, ինչպես նաև Հարավային Կովկասի, Կենտրոնական Ասիայի և ավելի լայն տարածաշրջանի միջև կապերի ամրապնդմանն աջակցելը:
Գրոնոն անդրադարձել է Նախիջևանի երկաթուղու վերականգնմանը Եվրամիության աջակցության հարցին, նշել՝ այն Բրյուսելի համար տարածաշրջանային կապակցվածության խթանման առանցքային տարրերից մեկն է: Պաշտոնյան տեղեկացրել է, որ այժմ աշխատանքներ են ընթանում ուսումնասիրություն սկսելու և համատեղ գործունեության պարամետրերը որոշելու ուղղությամբ։
Գրոնոն նաև հույս է հայտնել, որ նոր պայմանավորվածություններ ձեռք կբերվեն տարածքների ականազերծման ոլորտում Ադրբեջանին աջակցելու ուղղությամբ:
