Իսրայելի կառավարությունը հոկտեմբերի 10-ի գիշերը հաստատել է Գազայից պատանդներին վերադարձնելու ծրագիրը։ Նախարարների մեծ մասն աջակցել է գործարքին։ Սակայն ազգային անվտանգության նախարար Բեն-Գվիրը և այլ պաշտոնյաներ դեմ են քվեարկել, խոստացել խափանել կառավարության աշխատանքը, եթե ՀԱՄԱՍ-ը չոչնչացվի:
Զուգահեռ Բենիամին Նեթանյահուն Երուսաղեմում հանդիպել է ԱՄՆ նախագահի բանագնաց Սթիվ Ուիթքոֆի և Ջարեդ Քուշների հետ։
Այժմ, ըստ ամերիկյան նախաձեռնության, պետք է հրադադար հաստատվի, ՑԱՀԱԼ-ը հետ քաշվի Գազայի հատվածի համաձայնեցված գծեր՝ միաժամանակ պահպանելով որոշ տարածքների նկատմամբ վերահսկողությունը։ Ակնկալվում է, որ ՀԱՄԱՍ-ն էլ 72 ժամվա ընթացքում ազատ կարձակի 2023 թվականի հոկտեմբերի 7-ին առևանգված պատանդներին, ինչպես նաև կփոխանցի մահացած գերիների մարմինները։ Այնուհետև Իսրայելը կազատի հրեական պետության բանտերում պահվող մի շարք պաղեստինցիների։
