Կխնդրեի չօգտագործել «միջանցք» տերմինը ենթակառուցվածքների այն կտորի մասով, որը անցնելու է ՀՀ հարավով. Միրզոյանը՝ թուրք լրագրողին
Ամերիկյան ներկայությունը Հայաստանում նոր չէ, էլի կան ընկերություններ, որոնք ունեն ամերիկյան մասնակցություն: Շատ լավ է, որ այնպիսի երկիր, ինչպիսին Միացյալ Նահանգներն է, հետաքրքրություն ունի, սա և՛ տնտեսական բաղադրիչ ունի, և՛ քաղաքական: Դա Հայաստանի և Ադրբեջանի համար խաղաղության գործիքներից և երաշխիքներից մեկն է դառնում: Այս մասին «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում ասաց ՀՀ ԱԳ նախարար Արարատ Միրզոյանը՝ թուրք լրագրողի խնդրանքով անդրադառնալով TRIPP նախագծին:
Նախարարը նշեց՝ իր պատկերացմամբ՝ դա լինելու է հայ-ամերիկյան ձեռնարկություն, որը կկառուցի երկաթուղին և կզբաղվի ամենօրյա մենեջմենթով: Սա չի նշանակում ամերիկյան վերահսկողություն ենթակառուցվածքի նկատմամբ ընդգծեց Միրզոյանը:
«Բոլոր այն հարցերը, որոնք վերաբերելու են ինքնիշխանությանն ու իրավազորությանը, լուծված են: Լինելու է Հայաստանի ուղիղ ինքնիշխանությունն այդ ենթակառուցվածքի նկատմամբ, գործելու է Հայաստանի ուղիղ իրավազորությունը: Այստեղ երկրորդ կարծիք լինել չի կարող»,- նշեց նա՝ հավելելով, որ ստեղծված է այնպիսի մի հավասարակշռության կետ, որը շահավետ է բոլորին:
«Սա է համենայնդեպս իմ ընկալումը: Եվ հենց դա էլ երաշխիքն է նրա, որ այս ամենը կկենսագործվի և կունենա երկար կյանք»,- ընդգծեց արտգործախարարը:
Միրզոյանը ևս մեկ անգամ անդրադարձավ «միջանցք» բառին՝ ընդգծելով՝ հարցն այն է, թե ով ինչ է հասկանում միջանցք ասելով:
«Մենք էլ Հայաստանում ունենք Հյուսիս-հարավ ճանապարհային միջանցք: Այս դեպքում, երբ ասում ենք միջանցք, կա մի նրբերանգ, և ես կխնդրեի չօգտագործել այդ տերմինը ենթակառուցվածքների այն կտորի մասով, որն անցնելու է Հայաստանի հարավով: Ինչո՞ւ: Որովհետև տարբեր երկրներ, բանակցությունների տարբեր փուլերում, այս կամ այն կերպ ցանկություն են ունեցել, օրինակ՝ անվտանգային կամ ռազմական ներկայություն ունենալ երկաթուղու երկայնքով կամ վերահսկողություն ունենալ այդ ենթակառուցվածքի նկատմամբ:
Բայց մենք հիշում ենք այդ բանակցությունների ընթացքը, և երբ եթե որևէ մեկն այդ սենյակում ասում է միջանցք, մեզ մոտ մեխանիկորեն արթնանում է այդ մտահոգությունը, որ ինչ-որ մի թաքնված մտադրություն կա այստեղ, որը կարող է վնասել Հայաստանի ինքնիշխանությանը:
Հետևաբար, կա այդ ենթակառուցվածքի պաշտոնական համաձայնեցված անուն, որի տակ կա վարչապետ Փաշինյանի, նախագահ Ալիևի, նախագահ Թրամփի ստորագրությունը: Այդ անունն է TRIPP: Սա է այն, ինչ լինելու է Հայաստանի հարավում»,- ասաց ԱԳ նախարարը՝ դիմելով իրեն հարց ուղղած թուրք լրագրողին, որը, խոսելով TRIPP-ի մասին, օգտագործել էր «միջանցք» բառը:
