Չինաստանը դադարեցրել է հազվագյուտ մետաղների և մագնիսների լայն տեսականու արտահանումը՝ Միացյալ Նահանգների հետ առևտրային պատերազմի ֆոնին: Պեկինի գործողությունները սպառնում են դադարեցնել այն բաղադրիչների մատակարարումները, որոնք կարևոր են ավտոմոբիլային, ավիատիեզերական և ռազմական արդյունաբերության համար ամբողջ աշխարհում, հաղորդում է The New York Times-ը (NYT):
Չինաստանը նաև ուժեղացրել է յոթ հազվագյուտ հողային տարրի (սամարիում, գադոլինիում, տերբիում, դիսպրոզիում, լյուտեցիում, սկանդիում և իտրիում) արտահանման վերահսկողությունը։ Ըստ պարբերականի, չնայած դա ուղղակի արգելք չէ, որոշումը, սակայն, նշանակում է, որ իշխանությունները ուշադիր վերահսկելու են ցանկացած առաքում, նաև գնահատելու, թե ովքեր են վերջնական գնորդները և ինչու։
Bloomberg-ն էլ կարծում է, որ որոշումը սպառնում է ապակայունացնել հիմնական նյութերի համաշխարհային մատակարարումները, որոնք օգտագործվում են բարձր տեխնոլոգիական ապրանքների արտադրության մեջ՝ էլեկտրական մեքենաներից մինչև զենք:
Չինաստանն աշխարհում առաջատարն է հազվագյուտ մետաղների արտադրության մեջ։ ԱՄՆ երկրաբանական ծառայության տվյալներով՝ այդ երկրին բաժին է ընկնում համաշխարհային արտադրության գրեթե 70 տոկոսը, և Միացյալ Նահանգները կախված է դրանց մատակարարումներից։
