ԱՄՆ-ի Սենատը հաստատել է ՆԱՏՕ-ում ԱՄՆ-ի դեսպանի պաշտոնում նախագահ Թրամփի ներկայացրած Մեթ Ուիթաքերի թեկնածությունը՝ պաշտպանական դաշինքին Վաշինգտոնի հանձնառության վերաբերյալ աճող մտահոգությունների շրջանում:
Ուիթաքերն աշխատել է արդարադատության նախարարությունում Թրամփի առաջին պաշտոնավարման ժամանակ և այդ պաշտոնը ստանձնում է իրավապահ մարմիններում, այլ ոչ թե արտաքին քաղաքականության կամ ազգային անվտանգության ոլորտում աշխատելու փորձով, գրում է Euronews-ը:
Նրա թեկնածությունը հաստատվել է կուսակցական գծով՝ 52 կողմ, 45 դեմ ձայների հարաբերակցությամբ։
Իր հաստատման վերաբերյալ լսումների ժամանակ Ուիթաքերը սենատորներին հավաստիացրել է, որ Թրամփի վարչակազմի հավատարմությունը ՆԱՏՕ-ին «երկաթյա է»:
Դաշինքում ԱՄՆ-ի դերի ապագան կասկածի տակ է դրվել եվրոպացի դաշնակիցների նկատմամբ Թրամփի կոշտ քննադատության և Ռուսաստանի նախագահ Վլադիմիր Պուտինի հետ կապերն ամրապնդելու նրա ակնհայտ ցանկության պատճառով:
Թրամփը կոչ է արել դաշինքի անդամ մյուս երկրներին ավելացնել պաշտպանական ծախսերը, այլ ոչ թե ապավինել ԱՄՆ-ին:
