Եկեղեցիների համաշխարհային խորհուրդը (ԵՀԽ) ՄԱԿ-ի Մարդու իրավունքների խորհրդի 58-րդ հերթական նստաշրջանում հանդես է եկել հայ պատանդների մարդու իրավունքների վիճակի վերաբերյալ հայտարարությամբ՝ վերահաստատելով, որ Ադրբեջանի կողմից ապօրինի ձերբակալված առնվազն 23 անձ՝ ներառյալ քաղաքացիական անձինք, նախկին և ներկա պաշտոնյաներ և զինվորականներ, պետք է անհապաղ և անվերապահորեն ազատ արձակվեն:
ԵՀԽ-ի հայտարարության մեջ նշվում է, որ «Նրանցից շատերը ենթարկվել են խոշտանգումների և արժանապատվությունը նվաստացնող վերաբերմունքի, ինչպես փաստում են իրավապաշտպան կազմակերպությունները»:
ԵՀԽ-ն Մարդու իրավունքների խորհրդին կոչ է արել ձեռնարկել բոլոր հնարավոր միջոցները` ապահովելու այդ պատանդների ազատ արձակումը, իսկ բոլոր կողմերին` կատարել միջազգային իրավունքով նախատեսված իրենց իրավական պարտավորությունները` պաշտպանելու մարդու արժանապատվությունը և ապահովելու արդարությունը:
