Ադրբեջանում կայացած բանակցությունների ընթացքում Իսրայելն ու Թուրքիան չեն կարողացել համաձայնության գալ Սիրիայում լարվածությունը կանխելու հարցում, հաղորդում է իսրայելական պետական «Կան» հեռուստաալիքը։
Ըստ լրատվականի՝ բանակցությունները, որոնց ընթացքում իսրայելական և թուրքական կողմերը փորձում են համաձայնության գալ Սիրիայում նրանց միջև հակամարտությունները կանխելու մեխանիզմ ստեղծելու շուրջ, պետք է շարունակվեն հրեական Փեսախի տոնի ավարտից հետո, որն այս տարի ընկնում է ապրիլի 12-19-ը։
«Կանի» հաղորդման համաձայն՝ Անկարան իսրայելական պատվիրակությանն Ադրբեջան տեղափոխող Իսրայելի ռազմաօդային ուժերի ինքնաթիռին թույլ չի տվել անցնել Թուրքիայի օդային տարածքով, ինչի պատճառով այն ստիպված է եղել թռչել Թուրքիայից արևմուտք՝ Սև ծովի վրայով։
Ապրիլի 8-ին Իսրայելի վարչապետ Բենիամին Նեթանյահուն, ամփոփելով երկու ամսվա ընթացքում Վաշինգտոն կատարած իր երկրորդ այցը, հայտարարել է, որ իր երկիրը դեմ է Սիրիայում թուրքական ռազմական բազաների ստեղծմանը։ Միաժամանակ նա հնարավոր է համարել ԱՄՆ նախագահ Դոնալդ Թրամփի միջնորդությունը թուրքական և իսրայելական կողմերի միջև վեճերի լուծման հարցում։
Իր հերթին, Թուրքիայի արտգործնախարար Հաքան Ֆիդանը ապրիլի 9-ին հայտարարել է, որ Անկարան մտադրված չէ Սիրիայի տարածքում հակամարտության մեջ մտնել որևէ մեկի, այդ թվում՝ Իսրայելի հետ։ Միևնույն ժամանակ, նա անընդունելի է համարել հրեական պետության գործողությունները Դամասկոսի նկատմամբ, որտեղ Իսրայելի ռազմաօդային ուժերը անընդհատ հարվածներ են հասցնում տարբեր ռազմական թիրախների։
