.jpg?w=768&resize=768,0&ssl=1 "Iran is a special partner-friendly state for Armenia: Narek Babayan")
Հայաստանը մեծապես կարևորում է Իրանի հետ բոլոր ոլորտներում համագործակցությունը, և գոհունակությամբ ենք արձանագրում երկու երկրների խորհրդարանների միջև ձևավորված ջերմ, գործընկերային հարաբերությունները: Այս մասին ասել է ՀՀ ԱԺ Հայաստան-Իրան բարեկամական խմբի ղեկավար Նարեկ Բաբայանը՝ Իրանի Իսլամական Հանրապետության Մեջլիսի պատվիրակության հետ հանդիպման ընթացքում:
Հանդիպումը տեղի է ունեցել դեկտեմբերի 8-ին, որին մասնակցել է նաև բարեկամական խմբի անդամ Շիրակ Թորոսյանը:
«Իրանը Հայաստանի համար առանձնահատուկ գործընկեր-բարեկամ պետություն է, որն իր հավասարակշռված քաղաքականությամբ նպաստում է տարածաշրջանում խաղաղության հաստատմանն ու կայունության ամրապնդմանը»,- ասել է Նարեկ Բաբայանը:
Որպես ՀՀ ԱԺ Հայաստան-Իրան բարեկամական խմբի ղեկավար՝ Նարեկ Բաբայանն ընդգծել է խորհրդարանական համագործակցության կարևորությունը՝ նշելով, որ բարեկամական խմբերն օրենսդիր մարմինների միջև փոխըմբռնման ու փոխվստահության կարևորագույն դերակատարում ունեն:
ԻԻՀ Մեջլիսի պատգամավոր Էսմաել Սիավաշը, շնորհակալություն հայտնելով ջերմ ընդունելության համար, նշել է, որ երկու երկրներն ունեն բազմաթիվ ընդհանրություններ: Նա համոզմունք է հայտնել, որ ակտիվ փոխայցելություններն իրենց ուրույն դերակատարումը կունենան երկկողմ հարաբերությունների զարգացման գործում: Նա նաև շնորհակալություն է հայտնել Հայաստանում պարսկերեն լեզվի տարածմանն ու դասավանդմանն ուղղված բարենպաստ պայմաններ ապահովելու համար:
Նարեկ Բաբայանը բարձր է գնահատել Իրանում հայկական մշակութային ժառանգության նկատմամբ ցուցաբերվող հարգանքը: Էսմաել Սիավաշն էլ կարևորել է Իրանում հայ համայնքի դերակատարությունը:
Շիրակ Թորոսյանը տեղեկացրել է, որ ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի անդամ է: Նա կարևորել է Իրանի Մեջլիսի համապատասխան հանձնաժողովի հետ համագործակցության ակտիվացումը:
Անդրադարձ է կատարվել հնարավոր բոլոր ոլորտներում համագործակցությունը խորացնելուն ուղղված ծրագրերին, Կառավարության հեղինակած «Խաղաղության խաչմերուկ» նախագծին: Քննարկվել են նաև երկուստեք փոխայցեր կազմակերպելուն վերաբերող հարցեր:
.jpg "Iran is a special partner-friendly state for Armenia: Narek Babayan")
