Երբ խոսում ենք Հայաստանի ու Ադրբեջանի միջև հաստատված խաղաղության մասին, պետք է հասկանանք, որ հիմնական սկզբունքները համաձայնեցված են, օրինակ՝ երբ դա վերաբերում է փոխկապակցվածությանը, պետք է հասկանանք, որ խաղաղության պայմանագիրը նախաստորագրված է, բայց այս ամենով հանդերձ, մնում են հարցեր, որ ենթակա են կարգավորման: Այս մասին «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովում հայտարարեց ՀՀ ԱԳ նախարար Արարատ Միրզոյանը:
Որպես օրինակ՝ Միրզոյանը բերեց երկու երկրի հասարակությունների, քաղաքացիների միջև կապերը:
«Նաև պետք է ընդունենք, և այս մասին ասել էլ է պետք, որ այդ հաշտեցումը ժամանակ է պահանջելու, այդ հաշտեցման կարիքը կա, բայց հասարակությունների ամբողջական հաշտեցման բացակայությունը նաև օբյեկտիվ է, նաև պայմանավորված է հոգեբանական խոր տրավմայով, որը հասարակություններն ունեն, վերքերով, որոնք դեռ շատ շատ թարմ են, հաղթահարելու խնդիր կա, ժամանակ է պահանջում:
Եվ այս առումով քաղաքացիների միջև կապերը, այդ թվում՝ քաղաքացիական հասարակությունների միջև կապերն ու շփումները շատ կարևոր են: Մենք մեծ ուշադրություն ենք դարձնում դրան, նաև Ադրբեջանի ընկալումն է այդպես»,- ասաց Արարատ Միրզոյանը:
Նախարարը հիշեցրեց՝ Հայաստանում շաբաթներ առաջ տեղի ունեցան հանդիպումներ քաղհասարակության ներկայացուցիչների միջև:
«Որքանով տեղեկացված եմ, այս լսարանում ունենք փորձագետներ կամ լրագրողներ Ադրբեջանից, այդպիսի միջոցառումներ պետք է լինեն Ադրբեջանում, պետք է ներկայացուցիչներ լինեն Հայաստանից:
Միայն սա է ճանապարհն այդ երկխոսությունը նաև հասարակությունների միջև զարգացնելու համար»,- ասաց Միրզոյանը՝ ընդգծելով, որ դա ցավոտ գործընթաց է, հեշտ գործընթաց չէ:
