ՄԱԿ-ում Հայաստանի Հանրապետության պատվիրակությունը հուլիսի 10-ին մասնակցել և ելույթով է հանդես եկել ՄԻԱՎ/ՁԻԱՀ-ի մասով ՄԱԿ Գլխավոր Ասամբլեայի բարձր մակարդակի հանդիպմանը։ Այդ մասին հայտնում է ՄԱԿ-ում ՀՀ մշտական ներկայացուցչությունը:
Ելույթում Հայաստանյան կողմից վերահաստատվել է մինչև 2030 թվականը ՁԻԱՀ-ը որպես հանրային առողջության սպառնալիք վերացնելու նպատակին հանձնառությունը։ Ընդգծվել է ՄԻԱՎ-ի կանխարգելման, թեստավորման և բուժման ոլորտներում արձանագրված առաջընթացը։
Նշվել է, որ 2024 թվականից ՀՀ կառավարությունն ամբողջությամբ ապահովում է հակառետրովիրուսային դեղամիջոցների ֆինանսավորումը պետական միջոցների հաշվին, ինչը կարևոր նշանակություն ունի բուժման կայուն և հուսալի հասանելիության ապահովման հարցում։
Հավելվել է նաև, որ թեստավորման և առողջապահական ծառայությունների ծածկույթի ընդլայնումը նպաստել են հիվանդության ավելի վաղ ախտորոշմանը և դեպքերի հայտնաբերման բարելավմանը:
Ընդգծվել է նաև հավասարության, մարդու իրավունքների պաշտպանության, խտրականության վերացման ապահովման անհրաժեշտությունը որպես ՄԻԱՎ հակազդման արդյունավետ միջոց։
