Ֆրանսիայի նախագահ Էմանուել Մակրոնը, մեկնաբանելով Մերձավոր Արևելքում իրավիճակի սրացումը, աջակցել է Իսրայելին «ինքնապաշտպանության իր իրավունքում»: Միաժամանակ, X-ի հաղորդագրության մեջ նա կոչ է արել լիցքաթափել լարվածությունը տարածաշրջանում:
«Ֆրանսիան բազմիցս դատապարտել Է Իրանի ներկայիս միջուկային ծրագիրը և ի պատասխան ձեռնարկել բոլոր անհրաժեշտ դիվանագիտական միջոցները։ Այս համատեքստում Ֆրանսիան վերահաստատում է Իսրայելի ինքնապաշտպանության և իր անվտանգության ապահովման իրավունքը։ Ամբողջ տարածաշրջանում կայունությունը չվտանգելու համար բոլոր կողմերին կոչ եմ անում ցուցաբերել առավելագույն զսպվածություն և լարվածության լիցքաթափում»,– ասված է հաղորդագրության մեջ:
Ֆրանսիայի նախագահը նշել է, որ Իրանին և նրա միջուկային ծրագրին Իսրայելի հասցված հարվածներից հետո Ազգային պաշտպանության և անվտանգության խորհրդի նիստ է հրավիրել: Մակրոնը նշել է, որ կձեռնարկվեն բոլոր անհրաժեշտ միջոցները Ֆրանսիայի քաղաքացիներին և տարածաշրջանում երկրի դիվանագիտական ու ռազմական առաքելությունները պաշտպանելու համար։
