Կրեմլի խոսնակը մեկնաբանել է Դոնալդ Թրամփի խոսքը, որ Վաշինգտոնը կարող է լրացուցիչ մաքսատուրքեր սահմանել ռուսական նավթի համար, եթե Մոսկվան խանգարի ռուս-ուկրաինական կարգավորմանը: Դմիտրի Պեսկովը հայտարարել է, որ այդ բարդ հարցը քննարկվում է Վաշինգտոնի հետ:
Լրագրողների հարցին՝ երբ և որտեղ կարող են հանդիպել Դոնալդ Թրամփը և Վլադիմիր Պուտինը՝ նա պատասխանել է՝ դեռ հայտնի չէ: Մեկնաբանելով ԱՄՆ նախագահի առաջիկա հնարավոր այցը Սաուդյան Արաբիա՝ Կրեմլի խոսնակը նշել է՝ դա որևէ կապ չունի Ռուսաստանի նախագահի հետ:
Պեսկովը նաև հայտնել է, որ Էր Ռիադում ռուս-ամերիկյան բանակցությունների ընթացքում Ռուսաստանի պատվիրակության անդամ Կիրիլ Դմիտրիևը կարող է մեկնել Միացյալ Նահանգներ: Դմիտրի Պեսկովը լրագրողների հետ զրույցում չի բացառել նման հնարավորությունը: «Շարունակում ենք շփումը ամերիկացիների հետ տարբեր ուղիներով: Այլ կոնկրետ բան ասել չեմ կարող»,- հավելել է ՌԴ նախագահի խոսնակը:
Ավելի վաղ CNN-ը հայտնել էր, որ Դմիտրիևն այս շաբաթ կայցելի Վաշինգտոն՝ հանդիպելու Դոնալդ Թրամփի հատուկ բանագնաց Սթիվ Ուիթքոֆի հետ: Լրատվամիջոցի տվյալով՝ ԱՄՆ կառավարությունը ժամանակավորապես չեղարկել է ռուս պաշտոնյայի նկատմամբ սահմանված պատժամիջոցները՝ նրան վիզա տրամադրելու համար:
Մանրամասները՝ տեսանյութում:
