Ռուսաստանի արտգործնախարար Սերգեյ Լավրովը հայտարարել է, որ Մոսկվան չի դիտարկում Ուկրաինայում հրադադարից հետո եվրոպական խաղաղապահ ուժերի տեղակայման հնարավորությունը։ Նրա խոսքով՝ այդ հարցը պետք է համաձայնեցվի երկու կողմերի միջև, մինչդեռ «Ռուսաստանին այդ մասին ոչ ոք չի հարցրել»։
«Մեծ Բրիտանիան և Ֆրանսիան Ուկրաինայում եվրոպացի խաղաղապահներ տեղակայելու ծրագիր են պատրաստել՝ հրադադարի ռեժիմը վերահսկելու համար։ ԱՄՆ նախագահ Դոնալդ Թրամփը հայտարարել է, որ անհրաժեշտ է համարում Ուկրաինայում խաղաղապահ ուժերի առկայությունն այս կամ այն ձևով, բայց «որն ընդունելի լինի յուրաքանչուրի համար»,- ասել է Լավրովը։
Նա ընդգծել է, որ եվրոպացիների, մասնավորապես, Ֆրանսիայի և Մեծ Բրիտանիայի կողմից պարտադրված մոտեցումն ուղղված է հակամարտությունն ավելի սրելուն և այն հանդարտեցնելու ցանկացած փորձ ճնշելուն։
