Քննարկվել են Հայաստան–Բուլղարիա երկկողմ հարաբերությունների խորացմանը վերաբերող հարցեր

Գլխավոր հանձնակատար Զարեհ Սինանյանը Բուլղարիա կատարած աշխատանքային այցի շրջանակում հանդիպել է Պլովդիվի շրջանի ղեկավարի տեղակալ Ատանաս Տաշկովի հետ։ Այս մասին հայտնում են Սփյուռքի գլխավոր հանձնակատարի գրասենյակից։ Հանդիպմանը ներկա են եղել նաև Բուլղարիայում ՀՀ դեսպան Ծովինար Համբարձումյանը և Բուլղարիայում սփյուռքի գործերի հանձնակատար, Եվրոպայի հայերի միության նախագահ Արթուր Հովհաննիսյանը։

Զրուցակիցները բարձր են գնահատել Հայաստանի և Բուլղարիայի միջև առկա հարաբերությունները և հույս հայտնել, որ հանդիպումը կնպաստի երկու երկրների միջև փոխգործակցության զարգացմանն ու խորացմանը։

Հանդիպմանը քննարկվել են Հայաստան–Բուլղարիա երկկողմ հարաբերությունների խորացմանը, Բուլղարիայի հայ համայնքի և Բուլղարիայի կառավարության փոխգործակցության զարգացմանը վերաբերող հարցերի լայն շրջանակ։

Զարեհ Սինանյանն իր խոսքում նշել է, որ Պլովդիվի շրջանում բնակվող հայ համայնքն իբրև կամուրջ՝ կարևոր նշանակություն ունի Հայաստան–Բուլղարիա հարաբերությունների շարունակական զարգացման գործում։ Ատանաս Տաշկովը շնորհակալություն է հայտնել տեղի հայ համայնքին՝ Պլովդիվի շրջանի զարգացման հարցում ունեցած ավանդի համար և վստահություն հայտնել, որ երկու ժողովուրդների միջև առկա եղբայրական հարաբերություններն էլ ավելի զարգացում կապրեն։

Հանդիպմանն անդրադարձ է կատարվել տնտեսության տարբեր ուղղություններով Հայաստան–Բուլղարիա փոխգործակցության հնարավորություններին։

Աղբյուրը՝ ՀՀ Առաջին Լրատավական Ալիք