Երկուշաբթի Իսրայելի արտաքին գործերի նախարարությունը կանչել է Թել Ավիվում Իսպանիայի գործերի ժամանակավոր հավատարմատար Ֆրանցիսկ Պեդրոսին՝ բողոք հայտնելու Իսպանիայի երիտասարդության հարցերի նախարար Սիրա Ռեգոյի ՝ պաղեստինյան պետության աջակցության վերաբերյալ «գետից ծով» արտահայտության կապակցությամբ, հաղորդում է իսրայելական Yedioth Ahronoth թերթը:
Ըստ իսպանական լրատվամիջոցների՝ հինգշաբթի Մադրիդում՝ Իսպանիայում Պաղեստինի դեսպան Ֆադի Էլհուսեյնին ներկայացնելու միջոցառման ժամանակ, Ռեգոն հայտարարել է, որ Իսպանիան «ճիշտ դիրք է գրավել մերձավորարևելյան հակամարտության հարցում», իսկ Իսպանիայի հանրությունն աջակցում է «գետից մինչև ծով» պաղեստինյան պետության ստեղծմանը։ Նա նաև վարչապետ Բենիամին Նեթանյահուին անվանել է «պատերազմական հանցագործ» և Իսրայելին մեղադրել Գազայի հատվածում ցեղասպանության համար: Իսրայելն այդ հայտարարությունները որակել է որպես վարչապետ Պեդրո Սանչեսի գլխավորած Իսպանիայի կառավարության «համակարգված հակաիսրայելական քաղաքականության» մաս։
Իսպանիայի և Իսրայելի միջև հարաբերությունները վատթարացել են Մադրիդի կողմից Գազայում իսրայելական պատերազմի քննադատության ֆոնին: Իսպանիան Պաղեստին պետությունը պաշտոնապես ճանաչել է 2024 թվականի մայիսին։ 2026 թվականի ապրիլին Իսպանիայի ԱԳ նախարար Խոսե Մանուել Ալբարեսը կոչ է արել Եվրամիությանն ավելի կոշտ միջոցներ ձեռնարկել Իսրայելի նկատմամբ, այդ թվում՝ վերանայել հարաբերությունները Թել Ավիվի հետ։
