Իսրայելի արտաքին գործերի նախարարը դեմ է արտահայտվել երկու պետության բանաձևով իսրայելա-պաղեստինյան հակամարտության կարգավորմանը: Նա նաև հերքել է միջազգային հանրության մտահոգությունները, որ Գազայի հատվածում սովից մահացածների թիվը մեծանում է:
Գեդեոն Սաարի խոսքով՝ եթե Իսրայելը լսի տարբեր երկրների և կառույցների կոչերն ու դադարեցնի պատերազմը, դա թույլ կտա ՀԱՄԱՍ-ին մնալ իշխանության:
«Ակնհայտ է, որ գրեթե երկու տարվա պատերազմից հետո իրավիճակը ծանր է։ Բայց սովի մասին հայտարարությունները սուտ են»,- պնդել է դիվանագետը: Նա վստահեցրել է, որ Իսրայելը հումանիտար միջանցքներ է բացում, մարդասիրական աջակցություն է հասցնում պաղեստինցիներին օդով: Սաարը նշել է՝ չնայած ամեն ինչին՝ շարունակելու են ռազմական գործողությունները և հասնելու են իրենց նպատակին:
ՄԱԿ-ի տվյալով՝ Գազայի հատվածում սովից մահվան դեպքերն ավելանում են, նրանց թվում են երեխաներ: Արդեն հայտնի է սննդի պակասից ավելի քան 100 զոհի մասին, 40-ից ավելին՝ միայն հուլիսին: Նաև տեղեկություններ կան, որ իսրայելցի զինվորականները կրակ են բացում հումանիտար օգնություն ստանալու համար հերթ կանգնած պաղեստինցիների ուղղությամբ: Ստեղծված իրավիճակի կապակցությամբ մտահոգություն է հայտնել նաև ԱՄՆ նախագահ Դոնալդ Թրամփը:
