Միացյալ Նահանգների փոխնախագահի այցի ավելի հագեցած օրակարգ. մտածում էի՝ էլ ինչո՞վ կարող էինք հագեցնել: Այդպիսի հագեցած օրակարգով այցերը շատ չեն լինում: Այդ մասին ԱԺ-Կառավարություն հարցուպատասխանի ժամանակ ասաց վարչապետ Նիկոլ Փաշինյանը՝ արձագանքելով ընդդիմության՝ ԱՄՆ փոխնախագահ Ջեյ Դի Վենսի՝ Հայաստան կատարած այցին հետևած քննադատություններին:
«Ի՞նչ է եղել օրակարգը. եղել է ԹՐԻՓՓ-ը, օգոստոսի 8-ին Վաշինգտոնում ստորագրված երեք մեր մտադրությունների հուշագիրը, հիշում եք՝ այն ժամանակ էլ ասում էին՝ դե, մտադրությունների հուշագիր է: Ես էլ ասում էի՝ դրա համար է, որ հետագայում նաև դրանց հիման վրա պրոցեսներ տեղի ունենան: Ընդ որում, ԹՐԻՓՓ-ի շրջանակներում քննարկվել է հնարավոր էլեկտրաէներգիա, էլեկտրահաղորդման գծեր, խողովակաշարեր, մալուխներ, երկաթուղի: Ես, անկեղծ ասած, հիմա ուզում եմ հիշել ավելի մեծ, ծավալուն քննարկումներ, նկատի ունեմ՝ տնտեսական և քաղաքական, երբ ենք վերջին անգամ ունեցել, անվտանգային էլ չեմ ասում, որ առաջին անգամ է, ընդ որում՝ այսպիսի բան հաճախ չի լինում, որ ԱՄՆ-ն հենց պաշտոնական այցի ընթացքում ի ցույց է դնում, որ ամենաժամանակակից հետախուզական տեխնիկան է մատակարարվում ՀՀ-ին: Սա նրա մասին է, որ Հայաստանի և ԱՄՆ-ի միջև ռազմատեխնիկական համագործակցության ճանապարհը բացվել է: Այդ ԱԹՍ-ն ցույց տալու իմաստն այն է, որ ճանապարհը, ըստ էության, ՀՀ-ԱՄՆ ռազմատեխնիկական համագործակցության կանաչ լույսն է»,- նշեց վարչապետը:
«Մենք մեր ձեռքերը կկտրենք, բայց ընտրությունները չենք կեղծի, քանի՞ ընտրություն է կեղծվել 2018-ից հետո»,- անդրադառնալով ընդդիմության կողմից հնչող ընտրությունը կեղծելու մեղադրանքներին՝ ասաց Փաշինյանը:
Խոսելով ԵՄ-ի ներդրումների մասին՝ վարչապետն ասաց, որ այս պահի դրությամբ 900 մլն եվրոյի ծրագրեր կան, և առաջիկայում այդ ծրագրերը կավելանան: Նաև Հյուսիս-հարավի Սիսիան-Քաջարան հատվածի կառուցման փաթեթի շրջանակում ներդրումներ կլինեն:
Ինչ վերաբերում է Հայաստանում արտադրվող ԱԹՍ-ներին, ապա Փաշինյանն ասաց. «Չեմ թաքցնի՝ Հայաստանում կան լավ արտադրատեսակներ, և մենք նաև այդ լավ արտադրատեսակներն ենք ձեռք բերում, ԱՄՆ-ից ձեռք ենք բերում լավ արտադրատեսակներ և լավ արտադրատեսակները պատրաստ ենք վաճառել ԱՄՆ-ին, դա շատ նորմալ համագործակցություն է, կփորձենք այդ ոգով շարունակել»,- նշեց նա:
