ՀՀ արտաքին գործերի նախարարության գլխավոր քարտուղար Դավիթ Կարապետյանը հունիսի 13-ին Մարսելում մասնակցել է «Միջերկրական Ռաիսինա» համաժողովին և ելույթ է ունեցել «Հանգստություն հոսանքների մեջ. Հաղթահարելով հակամարտություններն ու ճգնաժամերը» խորագրով կլոր սեղան քննարկմանը։
Իր ելույթում գլխավոր քարտուղարը շեշտել է ծովային անվտանգության կարևորագույն նշանակությունը համաշխարհային առևտրի, խաղաղության և շրջակա միջավայրի կայունության գործում:
Նա ընդգծել է ծովային տարածաշրջաններին սպառնացող շարունակական վտանգները, այդ թվում՝ ծովահենությունը, մարդկանց անօրինական թրաֆիքինգը, կազմակերպված հանցագործությունները և աճող աշխարհաքաղաքական լարվածությունը, որոնք խաթարում են միջազգային կայունությունը:
Նա շեշտել է միջազգային իրավունքի, մասնավորապես՝ ՄԱԿ կանոնադրության և ՄԱԿ Ծովային իրավունքի մասին կոնվենցիայի լիակատար պահպանման անհրաժեշտությունը՝ որպես ինքնիշխանության, նավարկության ազատության և վեճերի խաղաղ կարգավորման ապահովման հիմք:
Նա նաև ընդգծել է զարգացմանը միտված և ներառական մոտեցումների միջոցով ծովային անապահովության արմատական պատճառների հասցեագրման կարևորությունը։
Դավիթ Կարապետյանը նշել է, որ, չնայած լինելով դեպի ծով ելք չունեցող երկիր, Հայաստանը ակտիվորեն նպաստում է համաշխարհային բնապահպանական ջանքերին: Վերջերս Նիցցայում կայացած ՄԱԿ–ի Օվկիանոսի հարցերով 3-րդ համաժողովի ընթացքում Հայաստանը ստորագրել է «Ազգային իրավասությունից դուրս գտնվող տարածքների ծովային կենսաբազմազանության մասին» համաձայնագիրը (BBNJ):
Հայաստանը պատրաստվում է նաև 2026 թվականին հյուրընկալել «Կենսաբազմազանության մասին» կոնվենցիայի կողմերի 17-րդ համաժողովը (COP17), որը կներառի օվկիանոսային կենսաբազմազանության ամուր շեշտադրում։
Գլխավոր քարտուղարը վերահաստատել է Հայաստանի հանձնառությունը բազմակողմ համագործակցությանը և ապագա սերունդների համար օվկիանոսների պաշտպանությանը։
