Ուկրաինայի արտգործնախարար Անդրիյ Սիբիհան հեռախոսազրույց է ունեցել իր իրանցի գործընկեր Աբբաս Արաղչիի հետ: Սիբիհան ասել է, որ դա իր նախաձեռնությունն է եղել, քանի որ ցանկանում է անկեղծ զրույց ունենալ և խուսափել ավելորդ սրացումից։ Զրույցի պատճառը Իրանի սպառնալիքներն էին Կասպից ծովում նավերի վրա ուկրաինական անօդաչու սարքերի հարձակումից հետո։
Սիբիհան նաև արձագանքել է Իրանի այն հայտարարությանը, որ նավի վրա հարձակման ժամանակ զոհվել է Իրանի մեկ քաղաքացի։ Նա ընդգծել է, որ ուկրաինական բոլոր գործողություններն ուղղված են բացառապես երկիրը ռուսական ագրեսիայից պաշտպանելուն և երբեք ուղղված չեն եղել քաղաքացիական նավերի կամ մարդկանց դեմ։
«Մեր նպատակն է հակազդել ռուսական ագրեսիային, որը բոլոր միջադեպերի արմատական պատճառն է, և հենց Ռուսաստանն է կրում բոլոր սադրանքների ու մարդկային զոհերի ամբողջական պատասխանատվությունը»,- նշել է արտգործնախարարը, միաժամանակ կոչ է արել Իրանին դադարեցնել աջակցությունը Ռուսաստանին և զերծ մնալ ցանկացած քայլից, որը կարող է հանգեցնել լարվածության սրման։
Իր հերթին, Իրանի արտգործնախարարը սոցիալական ցանցերում գրել է, որ Սիբիհան վստահեցրել է, որ իրանական նավի վրա հարձակումը միտումնավոր չի եղել, և Ուկրաինան չի ձգտում սրել հակամարտությունը։
Աբբաս Արաղչին իր ուկրաինացի գործընկերոջը վստահեցրել է, որ Թեհրանը նույնպես չի ձգտում սրացման։
