Եվրահանձնաժողովն առաջարկում է «փորձաշրջանի» համակարգ ԵՄ նոր անդամ պետությունների, այդ թվում՝ Ուկրաինայի և Մոլդովայի համար, ինչը ենթադրում է անդամակցություն սահմանափակ իրավունքներով։ Այս մասին հայտարարել է ընդլայնման հարցերով եվրահանձնակատար Մարթա Կոսը։
«ԵՄ նոր անդամները կարող են ընդունվել մի քանի տարվա փորձաշրջանով»,- գրել է եվրահանձնակատարը սոցիալական ցանցերում։ Նա բացատրել է, որ այդ ընթացքում նրանց իրավունքները կարող են սահմանափակվել, նրանք նույնիսկ կարող են վտարվել համայնքից, եթե չկատարեն ԵՄ բոլոր պահանջները։
Պարզաբանելով իր հայտարարությունները բրիտանական Financial Times (FT) թերթին՝ Կոսն այդ առաջարկը հիմնավորել է մտավախությամբ, որ նոր երկրները կարող են դառնալ «Ռուսաստանի տրոյական ձիեր»:
«Իմ ամենամեծ վախն այն է, որ ռուսները ԵՄ կմտնեն ետևի դռնով», — պարբերականը մեջբերում է Կոսին: Եվրահանձնակատարի խոսքով՝ Բրյուսելը վախենում է, որ ԵՄ ամդամ նոր երկրները կարող են գործել Հունգարիայի նման՝ արգելակելով Բրյուսելի առավել արմատական նախագծերը:
Կոսը հաստատել է, որ Եվրահանձնաժողովը աշխատում է նոր կանոնների ուղղությամբ, որոնք թույլ կտան «կասեցնել ԵՄ նոր երկրների իրավունքները Եվրամիության իրավունքի գերակայության չափանիշները խախտելու դեպքում»։ Միևնույն ժամանակ, նա հերքել է նոր և հին անդամների համար տարբեր իրավունքներով ԵՄ անդամակցության համակարգ ստեղծելու մեղադրանքները:
