Նոր տարվա նախօրեին ավարտվել է Սիրիական ժողովրդավարական ուժերի (SDF) ղեկավարության և Սիրիայի նախագահի միջև մարտի 10-ին ստորագրված համաձայնագրի ժամկետը։ Կողմերը հայտարարել են, որ մի շարք կետերի շուրջ վերջնական համաձայնության չեն հասել։
Երեքշաբթի օրը՝ կեսօրին, Հալեպի Շեյխ Մաքսուտ և Աշրաֆիե շրջաններում բախումներ են սկսվել Սիրիայի բանակի և քրդական ներքին անվտանգության ուժերի միջև։ Երեկոյան հայտարարվել է ժամանակավոր հրադադար։
Սիրիական բանակի ռազմական գործողությունների խորհրդի տվյալներով՝ Շեյխ Մաքսուտ և Աշրաֆիե շրջաններում բախումների վերսկսում է կանխատեսվում այսօր՝ տեղական ժամանակով ժամը 15:00-ից հետո։ Պետական մարմինները մարդասիրական միջանցքներ են բացել «Ավարեթ» և «Շարեհ Ազ-Զհուր» անցակետերից՝ տեղական բնակչության անվտանգ դուրս գալն ապահովելու նպատակով։
Ռազմական գործողությունների խորհուրդը հայտարարել է պարետային ժամ՝ սկսած այսօր ժամը 15:00-ից, մինչև նոր տնօրինում։ Այդ մասին հայտնել է Հալեպում «Լուրերի» թղթակից Զարմիկ Պողիկյանը:
Բախումների գոտուն հարակից տարածքներում բնակվող հայ բնակչության անվտանգության ապահովման նպատակով Ազգային առաջնորդարանը հայտնել է, որ Սուրբ Գրիգոր Լուսավորիչ եկեղեցու ներքնասրահը հասանելի է հայ բնակչության համար՝ որպես ժամանակավոր ապաստան՝ մինչև իրավիճակի կայունացումը։
Ցանկացած դժվարության կամ շտապ կարիքի դեպքում տրամադրվել են համապատասխան հեռախոսահամարներ, իսկ բժշկական օգնության անհրաժեշտության պարագայում Սիրիահայ օգնության խաչի Նոր Գյուղի դարմանատունը (կլինիկան) հայտարարել է, որ մինչև առավոտ բաց կպահի իր դռները, և բժիշկները տեղում կլինեն՝ անհրաժեշտ բուժօգնություն ցուցաբերելու համար։
