Հանրապետության նախագահ Վահագն Խաչատուրյանն ընդունել է Հայաստանում Ճապոնիայի արտակարգ և լիազոր դեսպան Աոկի Յուտակային։
Նախագահը ողջունել է դեսպանին և շնորհավորել Ճապոնիայի Ազգային տոնի՝ Կայսեր ծննդյան օրվա առթիվ, մաղթելով Ճապոնիայի ժողովրդին բարգավաճում և հաջողություններ։
«Շնորհավորում եմ Ձեզ և բարեկամ Ճապոնիայի ժողովրդին՝ Նորին Մեծության Ճապոնիայի կայսեր տարեդարձի կապակցությամբ։ Մեր երկու երկրների միջև դիվանագիտական հարաբերություններ հաստատելուց հետո դրանք զարգացել են երկու հենասյուների վրա՝ ժողովրդավարություն և մարդու իրավունքներ։ Մենք այն ժամանակ՝ որպես նոր ստեղծվող երկիր և արդեն նաև որպես ժողովրդավարական երկիր, մեր ճապոնացի գործընկերներից սովորել ենք և շարունակելու ենք սովորել, թե ինչպես շարունակել ապավինել ժողովրդավարական արժեքներին, զարգացնել տնտեսությունը, բարձրացնել երկրի քաղաքացիների կենսամակարդակը»,- նշել է նախագահը։
Դեսպան Յուտական իր շնորհակալությունն է հայտնել ընդունելության և բարեմաղթանքների համար։
Հանդիպման ընթացքում քննարկվել են Հայաստանի և Ճապոնիայի միջև գործընկերության հետագա զարգացման ուղիները, ինչպես նաև համատեղ նախագծերի իրականացման հնարավորությունները։ Հատուկ ուշադրություն է դարձվել քաղաքական, տնտեսական, բարձր տեխնոլոգիաների ոլորտներում փոխգործակցության ակտիվացմանը։ Կարևորվել է նաև Ճապոնիայի կողմից ցուցաբերված հումանիտար օգնությունը, շեշտվել է աղետների կանխարգելման և կառավարման ուղղությամբ համագործակցության ընդլայնման կարևորությունը։
Կողմերը կարևորել են գյուղատնտեսության ոլորտում համատեղ նախաձեռնությունների իրականացումը, ինչպես նաև տարբեր ուղղություններով երկկողմ հարաբերությունների սերտացման և նոր ծրագրերի խթանումը։
Երկու կողմերն էլ ընդգծել են բարձր մակարդակի քաղաքական երկխոսության, փոխայցելությունների և խորհրդարանական դիվանագիտության զարգացման կարևորությունը։ Բացի այդ, կողմերը փոխանակել են մտքեր տարածաշրջանային խաղաղության և ժողովրդավարական ինստիտուտների ամրապնդման վերաբերյալ։
Նախագահ Խաչատուրյանը շնորհակալություն է հայտնել Ճապոնիայի կառավարությանը և իշխանություններին՝ տարածաշրջանում խաղաղության հաստատման գործում շարունակական աջակցության համար։
