Վաշինգտոն է ժամանել Իսրայելի վարչապետ Բենիամին Նեթանյահուն՝ ԱՄՆ նախագահի հետ քննարկելու Գազայում հրադադարի հարցը: Նեթանյահուն Դոնալդ Թրամփի հետ կհանդիպի երեկոյան, իսկ մինչ այդ՝ պետքարտուղար Մարկո Ռուբիոյի և Մերձավոր Արևելքի հարցերով հատուկ դեսպանորդ Սթիվ Ուիթքոֆի հետ։ Իսրայելի կառավարության ղեկավարին ինքնաթիռի աստիճանների մոտ դիմավորել են ԱՄՆ-ում Իսրայելի դեսպանը և Նյու Յորքում գլխավոր հյուպատոսը։
ԱՄՆ նախագահ Դոնալդ Թրամփը շարունակում է դիվանագիտական ջանքերը՝ Իսրայելի և ՀԱՄԱՍ-ի միջև հրադադարի հաստատման համար։ Իսրայելը նախկինում ընդունել է ԱՄՆ առաջարկը, պաղեստինյան խմբավորումը հայտարարել էր, որ իր արձագանքը «դրական» է, սակայն հրադադարի մանրամասները դեռ պետք է մշակվեն, գրում է Euronews-ը։
Դոհայում քննարկվող փաստաթղթում ձևակերպված են 60-օրյա հրադադարի ծրագրերը, որի ընթացքում ՀԱՄԱՍ-ը հանձնելու է 10 ողջ իսրայելցի պատանդի և 18 աճյուն: Նեթանյահուի տվյալներով՝ ՀԱՄԱՍ-ի ձեռքում մնացած պատանդներից «20-ը ողջ են, 30-ը՝ մահացած», և ինքը «վճռական է նրանց բոլորին վերադարձնելու հարցում»: Հրադադարի գործարքի համաձայն՝ իսրայելական զորքերը պետք է հետ քաշվեն Իսրայելի և Եգիպտոսի հետ Գազայի սահմանի երկայնքով գտնվող բուֆերային գոտի։ Հրեական պետությունը նաև պարտավորվում է տրամադրել զգալի քանակությամբ մարդասիրական օգնություն։
The Wall Street Journal-ը, հղում անելով աղբյուրին, գրում է, որ Իսրայելի բանակի շտաբի պետ Էյալ Զամիրը աջակցություն է հայտնել ՀԱՄԱՍ արմատական պաղեստինյան շարժման հետ իսրայելցի պատանդների ազատ արձակման վերաբերյալ համաձայնագրի կնքմանը: Ըստ բարձրաստիճան զինվորականի՝ գործողությունների շարունակությունը կարող է սպառնալ պատանդների կյանքին, ՀԱՄԱՍ-ի հետագա թուլացման հավանականություն էլ կասկածելի է։
Իսրայելի վարչապետը, սակայն, շարունակում է պնդել անկլավում ՀԱՄԱՍ-ին իշխանությունից հեռացնելու և արմատականներին լիովին զինաթափելու անհրաժեշտությունը:
