ԵԽԽՎ գարնանային նստաշրջանում անդրադարձել են Հարավային Կովկասում մարդու իրավունքների վիճակին: Եվրոպայի խորհրդի մարդու իրավունքների հանձնակատար Մայքլ Օ՛Ֆլայհերթին ողջունել է այն փաստը, որ Հայաստանն ընդունել է Լեռնային Ղարաբաղից բռնի տեղահանված հայերին: Նա վստահեցրել է, որ կօգտագործի իր մանդատն ու ամբողջ գործիքակազմը՝ պաշտպանելու մարդկանց իրավունքներն ամբողջ աշխարհում, այդ թվում՝ Հարավային Կովկասում:
«Պետք է լրջորեն հոգ տանենք տարածաշրջանում մարդու իրավունքների մասին: Նաև հարկավոր է երաշխավորել, որ նրանք, ովքեր ցանկանում են վերադառնալ Ղարաբաղ, նման հնարավորություն ունենան: Սա վճռորոշ կլինի երկարաժամկետ հեռանկարում»,- ասել է հանձնակատարը:
ԵԽԽՎ-ում ՀՀ ԱԺ պատվիրակության անդամ Արուսյակ Ջուլհակյանն էլ բարձրացրել է Ադրբեջանում պահվող հայ գերիների մասին հարցը:
«Էթնիկ հայերի նկատմամբ ամոթալի դատավարություն է իրականացվում, նրանք պետք է անհապաղ ազատ արձակվեն: Տարբեր իրավապաշտպան կազմակերպություններ և միջազգային հեղինակավոր կառույցներ պարբերաբար մտահոգություն են հայտնում նրանց նկատմամբ խոշտանգումների և դաժան վերաբերմունքի հետ կապված»,- հայտարարել է Ջուլհակյանը և հիշեցրել, որ Ադրբեջանն անգամ հայտարարել է Կարմիր խաչի գործունեությունը երկրում դադարեցնելու մտադրության մասին:
