Ֆրանսիան առաջ է մղում Գազայում «Կայունացման միջազգային առաքելություն» ստեղծելու նախաձեռնությունը, որը կփոխարինի այնտեղ գտնվող Իսրայելի պաշտպանության ուժերին և կկենտրոնանա պատերազմից հետո ՀԱՄԱՍ-ի զինաթափման վրա, հաղորդում է The Times of Israel-ը՝ հղում անելով ֆրանսիական առաջարկի նախագծին։
Ըստ թերթի՝ նախաձեռնության գլխավոր նպատակն է իրականացնել հուլիսին ընդունված միջազգային հռչակագիրը, որը կոչ է անում ստեղծել երկու պետություն, զինաթափել ՀԱՄԱՍ-ը և Գազայում ներքին անվտանգության հետ կապված հարցերն աստիճանաբար փոխանցել Պաղեստինի վարչակազմին:
Նախագծում թվարկված են անցումային առաքելության ձևավորման համար նախընտրելի երկրները՝ Եգիպտոս, Հորդանան, Սաուդյան Արաբիա, ԱՄԷ և Կատար։ Առաքելությունը կլինի ժամանակավոր՝ ՄԱԿ-ի մանդատի ներքո, և կսկսի աշխատանքը, երբ իրավիճակը թույլ տա։
Հուլիսին Նյու Յորքում ընդունվել է հռչակագիր, որի համաձայն Գազայում պետք է տեղակայվի ժամանակավոր միջազգային առաքելություն՝ Պաղեստինի ազգային վարչակազմի մասնակցությամբ և ՄԱԿ-ի հովանու ներքո: Փաստաթղթի նախաձեռնողներն են Ֆրանսիան և Սաուդյան Արաբիան։ Դրան աջակցել են արաբական երկրները, հետագայում այն ամրագրվել է ՄԱԿ-ի Գլխավոր ասամբլեայի բանաձևով։
