ԱՄՆ նախագահ Դոնալդ Թրամփը հայտարարել է, որ հեռախոսազրույց է ունեցել Իսրայելի վարչապետ Բենիամին Նեթանյահուի հետ, որի ընթացքում կողմերը քննարկել են Իրանն ու մի շարք այլ հարցեր։
«Մենք բազմաթիվ թեմաներ ենք քննարկել, ամեն ինչ լավ ու հարթ է անցել, կտեսնենք՝ ինչ կլինի հաջորդիվ։ Խոսքը մի երկրի մասին էր, որի անունը դուք հիշատակեցիք՝ Իրանի մասին»,- լրագրողների հետ զրույցում նշել է Թրամփը։
Kan պետական հեռուստառադիոընկերությունը տեղեկացրել է, որ Թրամփն ու Նեթանյահուն քննարկել են Իրանի միջուկային ծրագրին առնչվող հետագա քայլերը։ Անվտանգության ոլորտի աղբյուրների տվյալներով՝ Իսրայելը չի կարող հանդուրժել, որ Իրանը պահպանի իր տարածքում ուրանի հարստացման հնարավորությունը, ուստի բանակցությունների խաթարման դեպքում Իսրայելը ստիպված կլինի որոշում կայացնել Իրանի նկատմամբ հնարավոր հարձակման մասին։
Թրամփը հայտարարել է, որ միջուկային ծրագրի վերաբերյալ ԱՄՆ-Իրան բանակցությունների նոր փուլը տեղի կունենա հունիսի 12-ին։
