ԱՄՆ պետքարտուղարությունում կայացել են Իսրայելի և Լիբանանի միջև չորրորդ ուղիղ բանակցությունները՝ դեսպանների մակարդակով: Երկրները դիվանագիտական հարաբերություններ չունեն և պատերազմի վիճակում են 1948 թվականից ի վեր: Բանակցությունները պետք է շարունակվեն երկու օր:
Ավելի վաղ ԱՄՆ նախագահը հայտարարել էր, որ զրուցել է Իսրայելի վարչապետ Բենիամին Նեթանյահուի հետ և կանխել իսրայելական զորքերի առաջխաղացումը դեպի Բեյրութ: Ըստ Թրամփի՝ «Հըզբոլլահ»-ը նույնպես համաձայնել է դադարեցնել հարվածներն Իսրայելին: Այդուհանդերձ, Լիբանանը հայտնել է իսրայելական հարվածներից նոր զոհերի և վիրավորների մասին:
Դոնալդ Թրամփը նաև հայտարարել է, որ Իրանի հետ հրադադարի ռեժիմը երկարաձգելու և Հորմուզի նեղուցը վերաբացելու շուրջ համաձայնագիր կարող է կնքվել հաջորդ շաբաթվա ընթացքում։
Միևնույն ժամանակ, Իսլամական հեղափոխության պահապանների կորպուսը հայտնել է, որ վերջին 24 ժամվա ընթացքում Հորմուզի նեղուցով 24 նավ է անցել՝ իր ուժերի հետ համակարգմամբ: ԻՀՊԿ-ն հավելել է, որ իրենք լիովին պատրաստ են ցանկացած հնարավոր սցենարի. բոլոր մարտական դիրքերը պատրաստության ամենաբարձր վիճակում են:
