Իսրայելը մտադիր է ԱՄՆ-ի հետ նոր 10-ամյա ռազմական օգնության համաձայնագիր ստորագրել՝ պատրաստվելով ֆինանսական աջակցության զգալի կրճատմանը՝ հաղորդել է Financial Times-ը։
Ընթացիկ համաձայնագիրը, որի ժամկետը լրանում է 2028 թվականին, նախատեսում է Թել Ավիվին տարեկան հատկացնել առնվազն 4 միլիարդ դոլար։ Պաշտպանության նախարարության գլխավոր ֆինանսական խորհրդական Ջիլ Պինչասի խոսքով՝ Իսրայելն առաջիկա շաբաթներին սպասվող բանակցություններում կձգտի առաջնահերթություն տալ համատեղ ռազմական և պաշտպանական նախագծերին՝ դրամական սուբսիդիաների փոխարեն։
«Այս համատեքստում գործընկերությունն ավելի կարևոր է, քան պարզապես ֆինանսական հարցը: Շատ բաներ կան, որոնք համարժեք են փողին»,- նշել է նա։ Զուտ ֆինանսական աջակցությունը կամ, ինչպես ինքն է ասել, տարեկան մի քանի միլիարդ դոլարի «անվճար փողը», որն Իսրայելը կարող է օգտագործել ամերիկյան զենք գնելու համար, համաձայնագրի միայն «մեկ բաղադրիչն» է։
Ավելի վաղ հաղորդվել էր, որ «անվտանգության ոլորտում փոխըմբռնման նոր հուշագրի» շուրջ բանակցությունները որոշ ժամանակով հետաձգվել էին Գազայում պատերազմի պատճառով: Իսրայելական կողմի առաջարկի համաձայն՝ նոր համաձայնագրում միջոցների մի մասը կարող է օգտագործվել ամերիկա-իսրայելական համատեղ հետազոտությունների և մշակումների, այլ ոչ թե ուղղակի ռազմական օգնության համար: Դա կարող է վերաբերել պաշտպանական տեխնոլոգիաներին, պաշտպանության ոլորտում արհեստական բանականությանը և «Ոսկե գմբեթ» հակահրթիռային պաշտպանության նախագծին։
