ՄԱԿ-ի Տնտեսական և սոցիալական խորհրդի չորրորդ լիագումար նիստի ընթացքում Հայաստանն ընտրվել է ՄԱԿ-ի խաղաղաշինության հանձնաժողովի կազմակերպչական կոմիտեի անդամ՝ 2026 թ. հունվարի 1-ից դեկտեմբերի 31-ն ընկած ժամանակահատվածի համար։ Այդ մասին հայտնում է ՄԱԿ-ում ՀՀ մշտական ներկայացուցչությունը:
«Կազմակերպչական կոմիտեն մշակում է Խաղաղաշինության հանձնաժողովի ընթացակարգի կանոնները և աշխատանքային մեթոդները, հաստատում է Հանձնաժողովի օրակարգը, գումարում է հանդիպումներ՝ իր լիազորությունների իրագործման և համապատասխան կազմակերպչական հարցերի կարգավորման նպատակով։
Հայաստանը պատրաստակամ է իր ակտիվ ներդրումն ունենալ Կոմիտեի կողմից ներառական և կայուն խաղաղության առաջմղմանը նպաստելու հարցում»,- ասված է ներկայացուցչության հաղորդագրության մեջ։
