Մենք հետաքրքրված ենք, որ Իրանում իրավիճակը կայուն լինի, և հույս ունենք՝ այդպես էլ կլինի, և այդպես էլ կա: Այս մասին խորհրդարանում ճեպազրույցում հայտարարեց ԱԺ նախագահի տեղակալ Ռուբեն Ռուբինյանը՝ անդրադառնալով Իրանում ստեղծված իրավիճակին:
«Ծրագրերի հետ կապված՝ որևէ դեպքում որևէ սպառնալիք չի լինի»,- ասաց Ռուբինյանը:
Ինչ վերաբերում է լրագրողների դիտարկմանը երրորդ երկրների ներգրավվածությանը ԹՐԻՓՓ նախագծում, նկատեց՝ օրերս հրապարակվել է փաստաթուղթը, թե ինչ սկզբունքներով է ստեղծվելու ԹՐԻՓՓ ընկերությունը:
Նա հիշեցրեց՝ ԹՐԻՓՓ ընկերությունը հայ-ամերիկյան ընկերություն է և ոչ թե հայ-ամերիկյան և այլ երկրի: Եվ այս առումով այլ երկրի մասնակցություն չի նախատեսվում:
«Բայց երբ խոսում ենք ավելի լայն իմաստով ԹՐԻՓՓ ծրագրից օգուստներ քաղելու վերաբերյալ, այստեղ, իհարկե, օգուտներ քաղելու են թե Իրանը, թե Վրաստանը, թե Թուրքիան, թե Ռուսաստանը: Եկեք տարբերակենք մասնակցություն բիզնես-նախագծում, նման բան չի նախատեսվում, և ԹՐԻՓՓ-ի արդյունքում տարածաշրջանային ենթակառուցվածքների ապաշրջափակման արդյունքում օգուտներ հարևան երկրների համար, այստեղ միանշանակ նաև ուղիղ կապ կա այն իմաստով, որ ԹՐԻՓՓ-ի գործարկման արդյունքում և ապաշրջափակման օրինակ՝ Հայաստանը, օրինակ՝ երկաթգծային կապ է ստանում Իրանի, ՌԴ-ի հետ, Ռուսաստանը՝ Թուրքիայի»,- ասաց Ռուբինյանը:
Ինչ վերաբերում է ՀՀ նախկին արտգործնախարար Վարդան Օսկանյանի քննադատությանը ծրագրի իրականացման վերաբերյալ, նկատեց՝ հրապարակված փաստաթուղթը այն մասին է, որ միջանցք չի լինելու:
Նա հիշեցրեց՝ ինչի մասին են եղել մտահոգությունները այս վերջին 5 տարում, ընդգծեց՝ հրապարակված փաստաթղթում սևով սպիտակի վրա գրված է՝ անվտանգությունը պահելու են ՀՀ համապատասխան մարմինները, անձնագրային և մաքսային ընթացակարգեր լինելու են, հայ սահմանապահները ֆիզիկապես ներկա են լինելու համապատասխան անցագրային և մաքսային տեղերում:
«Բա իրենք որ «գույք՝ պարտքի դիմաց» մեր ռազմավարական օբյեկտները հանձնում էին այլ պետության, ինչի՛ են 100 տոկոսը հանձնել: Պարոն Օսկանյանի օրոք մեր ռազմավարական օբյեկտների մի մեծ մաս հանձնվել է օտար պետության: Թող հեքիաթներ չպատմեն»,- նշեց նա՝ պատասխանելով քննադատությանը, թե ինչու է Հայաստանի մասնաբաժինը քիչ լինելու ԹՐԻՓՓ զարգացման ընկերությունում (26 տոկոս):
«Որովհետև ներդրումներ է անելու ԱՄՆ-ն»,- պարզաբանեց Ռուբինյանը:
Հիշեցնենք՝ հունվարի 13-ին ՀՀ ԱԳ նախարար Արարատ Միրզոյանը հանդիպում էր ունեցել ԱՄՆ պետքարտուղար Մարկո Ռուբիոյի հետ։
Ավելի ուշ ՀՀ ԱԳՆ-ն հրապարակել էր «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) ծրագրի համար Հայաստան-ԱՄՆ կենսագործման շրջանակի հրապարակման վերաբերյալ համատեղ հայտարարությունը, որի տեքստը տարածվել է Հայաստանի Հանրապետության և Ամերիկայի Միացյալ Նահանգների կառավարությունների կողմից։ Հայաստանը մտադիր է ԱՄՆ-ին առաջարկել ԹՐԻՓՓ զարգացման ընկերության 74% մասնաբաժինը և պահպանել 26% մասնաբաժինը։
